full screen background image
   الثلاثاء 19 مارس 2024
ر

فنان مسرحي يحتفل بمرور سنة دون تدخين على طريقته الخاصة

احتفل الممثل المسرحي واستاذ التربية المسرحية محمد البرهومي بمرور سنة على اقلاعه عن التدخين بطريقته الخاصة فكتب على جداره الخاص على الفايسبوك سينايو لحوار ثنائي بينه وبين سيجارته وضميره مفادها قصة صراع مير مع التدخين انتصر عليه في الاخير، هذا نصه:
سيڨارو: ريت أحنا ڨداش نحبّوك، ونقدّروك ونحترموك
المدخّن: يكبّر قدركم، حتى أنا هاني ديما فارح بيكم، 4 عالخوا، وفي الصباح 6 مع express، ولعشية أنا والجو، أما ما نطيحش على 10 مع كويّس تاي منعنع وطرف قارص لايث، وكان حلت السهرية نعجعج أمها بوحدة شيشة جيراك، نروح نتراما…والأكسجين نثبت عليه مالابتدائي…
السيڨارو: أحنا زادا ماناش مقصّرين، طوّرنا في نَوْعنا وعلى كل لون يا كريمة، ولا حرمنا زوالي ولا نسينا والي… الضمير: (يشخر في سابع نومة)
المدخّن: وهي والي، ووزير، وطبيب، مازال كان الي يدبي عالحصير…في بلادي من باكوه تفهم عشاه، الكريستال للأبطال، وأبطالنا بطّالة، والـlégere للجماعة الي تخدم نهار بنهار…
السيڨارو: بربي زيدهم جماعة الأمن والحماية وسلك التعليم الابتدائي والاعدادي والثانوي…وبالنسبة لجماعة الفاك متاع goloise و Kamel…
المدخّن: أما الدخان يبقى رجلة، للرجال..
السيڨارو: اي أما زادا نسَانا مانسيناهمش، عملنالهم سيڨارو جويّد على قد رواريهم، slims كلو بنة وڥيتامين…
الضمير: (مازال يشخر وحالف لا يتڨعدها)
المدخّن: ساعات تطيح بيا، ندوّرها pin الوديان légende يڨطر، لين تحس رواريك تزفّر، عمري لا ركبت في بابور، أما سمعت صوت البابور في رواريا…
السيڨارو: اااا مالا أحنا نخلوك تسافر معانا…لحقيقة الكناطرية ربي يباركلهم ويعطيهم على قد قلوبهم، قداش ناس طيبة، مريسكي بروحو من أجل الطبقة الكادحة، من أجل البطالة والمتّكين عالحيوط، من أجل الشباب الي مطيشين في القهاوي الشعبية يكحّلوا عالماشي والجاي، وتسمع كان أرشم، ولازمها طرح عجين، واللعبة عالڨازوز كاسحة… ماهمش مقصّرين، وربي ينصر الزوالي… المدخّن: تعرف الي يعجبني فيك؟!
السيڨارو: يزي ما تحشمّنيش المدخّن: هكا توا رانا عشرة، طاح القدر بيناتنا… السيڨارو: عاد انت طيحتوا، ملي وليت تتكيف ڨدام بوك وأمك، وهذا يعتبر قمّة في قلّة الحياء…تمشيش تطيّش سيڨاروك كي يتعدا استاذك، ولا رد بالك تحشم من راجل كبير وڨلو بكل رقعة وتربية يا حاج أعطيني نشعّل، ولا رد بالك تقدّر مرا حبلة وما تتكيفش بحذاها، راو راسك يزنزن، en plus ماكش مسؤول عالنسل، وماكش قابلة؟!
المدخّن: لا….لا…حتى هي ما قدرّتنيش كي حبلت، وبتوامة زادا… الضمير: (يتثاوب، أما مازال يجبد فيه خميري)
السيڨارو: مالا تستاهل…بربي موش كي تشعّل سيڨارو، وتبدا تبوّخ، تتحوّل، تحسّ روحك ملك في زمانك، وتتخيل روحك رئيس شركة Ferrari و Monica Bellucci دموعها على خديها، وتقلك نحبك ونموت عليك، وانت تقلها ابعديني راني باش نبدّل نومرويا، تحسّ روحك عندك معامل وشركات ما تعرفش طرف خلاك وين، وإش يا ذبانة ما فما في الدنيا كان أنا…
المدخّن: صحيح، كي نبدا بدخاني، ننسى الڨلڨ، ونركش مع روحي سوايع…
السيڨارو: يا ولدي أحنا نموتو على السلام، وأحنا مصدر السلام، وكان جات الدنيا دنيا drapeau السلام يزيدو فيه سيڨارو، قلي علاش؟
الضمير: ( يظهرلي متوفّي عندو سنين، لا حركة، لا حراك، كان شخيرو يزفّر) المدخّن: علاش؟!
السيڨارو: ايا تخيّل روحك ما تتكيفش، بعيد الشرّ عليك، راك كل يوم عامل عركة، وأقلّ واحد يتشوحرلك تصرفڨو ببونية، برا عاد كان واحد قلّك كلمة موش باهية، راك تهز فيه وتنفض، وتربح كان في دعا الشرّ…
المدخّن: صحيح هو الي يهدّيلي أعصابي، ويخليني نلعن الشيطان…
السيڨارو: يلعنوا ويخزيه
المدخّن: عيش خويا تعيش وترحّم، والا راني فار حبوسات تو…
السيڨارو: يا ولدي فار، اناكوندا، ضبع، موش مشكل…المهم أحنا موش نورمال، شعارنا لا للعنف، أحنا ضد العنف، السيڨارو أخلاق أو لا يكون…بربي بعد اذنك، نعمل l’appel ونرجعلك…
المدخّن: خوذ راحتك هاني نعمل في سيڨارو…
السيڨارو: كريستال حاضر، Kamel حاضر، Marlboro أحمر وأبيض حاضر، gouloise حاضر، mérite حاضر، léger…léger….يا léger، وينك، باش يهبلني هذايا، ضربة اثنين مفقود…آش يموتوا عالزيادة…
الضمير: (نني نني جاك النوم، أمك بڨرة وبوك ثور..)
المدخّن: زيدني قهوة، خلّيني نرحي معاها باكو دخان شعندي نعمل…
السيڨارو: تعجبني كي تبدا تِكْمي، هاي الأفكار المزيانة، تكيّف بڨلة ليها، باش تعيش فيها مرّتين، أحنا نموتو على خاتركم…اييييه سيڨارو بعد الفطور، وسيڨارو النوم…
المدخّن: سيڨارو وأنا نستنى في الميترو والكار
السيڨارو: سيڨارو وانت في الطوالات ولا في الأحلام…
المدخّن: سيڨارو وأنت تستنى في شكون…
السيڨارو: سيڨارو وقهوة.. المدخّن: وقهوة السيڨارو…
الضمير: (يفيق يكحكح) علي، صامد، أوس، منى، عادل، وفاء، سهيل، خليل، أحمد، هيثم، مريم، هاجر، يسرى، يمنى، آمال، عبد الباسط، عبد الرحمان، طاهر، الناصر، محمد، هناء، ياسين، سيف، مختار، نورس، عفاف، سناء، عواطف، مروى، أروى، عبد الله، منعم، عبير، آدم، أحلام، نجاة، أمين، أمينة، أميرة، عمار، أريج، مكرم، أيمن، بلقيس، بلال، بوبكر، شكيب، شرف الدين، محمد علي، ضياء، ضحى، دنيا…أحنا فين؟؟؟ شنيا البلاصة البيضة، حد فيكم يجاوبني، شبيكم ما تتحركوش، شبيه النفس مقطوع، شبيني نسمع في برشا بكا ودموع، شنيا الحفر الي دايرة بينا، ياخي البلاد ناقصة حفر، شبيها الدنيا ظلمة دحيس؟! مانيش نسمع في صوت دقّات قلوبكم، شنيا الدود الي ياكل في لحمكم؟! وعلاش ملفوفين بالأبيض؟؟ وشنيا هالقطن؟؟؟ يا عالم؟! ياخي أنا وين؟ هزني النوم، فقت لقيت الدنيا تبدلت، علاش ما فيقتونيش مالأول، علاش…
ملاحظة: حمد لله أنا اليوم نحتفل بعامي لولاني من غير دخان 🎂🥳 فيّقني ضميري يرحم والديه وربي يعطيه على قد قلبو قبل ما نهزّ روحي للجبانة على بكري، تذكّرت حكايتي مع باكو ونص دخان يوميا و 3 express، اليوم جوي باهي نشمّ ونستطعم ونتنفس في هواء نظيف، صحتي لباس وفلوسي في جيبي… المشهد هذايا يخلّيك تعيش لحكاية، أما يخليك زادا تراجع روحك وتقول وقتاش صاحبي (تي)، اجبد ضميرك كان لزم اعطيه 14 كفّ على حنك واحد، وطيش عليك…